2007/04
小龍今日2歲大啦~呢隻妹妹一出世就令人擔心.
小龍出世0既時候, 佢左邊0既後腳因為俾臍帶繞住咗,前腳掌就係咁而脫落咗, 好彩既係小龍0既傷口並無受到感染, 亦因為有貓媽媽0既照顧, 小龍慢慢成長, 到咗3個月0大既時候, 小龍妹妹展轉間就黎到我地屋企, 同大軍,兵仔倆個哥哥一齊生活……
由於小龍0既媽媽雪雪係一隻精神好緊張0既貓, 對人既介心好重, 小龍係學習0既時候除咗學會走走跳跳同守獵0既行為之外, 仲學識咗媽媽既絕招–Fee人!! 除咗貓媽媽之外, 小龍未同過其他貓貓相處咖, 所以,當小龍0黎到我地屋企, 見到倆個貓哥哥,第一個反應就係Fee..大軍哥哥表現較為熱情, 無論妹妹點Fee..佢都走去嗅住妹妹, 但係兵仔反應就好大, 佢好唔開心, 自己走埋一邊,無晒心機咁既樣……
妹妹真係好驚, 我一講野, 佢就震一震, 當時我都好驚嚇親佢.
可憐0既妹妹, 行起路上0黎拐下拐下, 但係佢跳得好高, 仲叻過大軍哥哥,我見到大軍仲反過來學小龍跳高跳低, 佢倆隻貓貓係屋裡面不停咁跳, 果時兵仔仲嬲緊, 只係係遠處望住佢地, 而妹妹就好醒目, 成日走去兵仔哥哥度, 直至哥哥接受佢為止.
妹妹好活潑咖, 成日擔住棒棒自己玩, 又或者將棒棒放係我面前, 喵喵,喵喵咁叫我同佢玩, 倆個哥哥都好錫佢, 成日都同佢恬毛, 攪到佢頭仔濕漉漉, 佢既咀仔成日都係度笑住, 係一隻好開心既貓囡囡.
獸醫曾經叫我考慮將妹妹左邊0既一整隻後腿切除, 因為咁樣,佢0既活動能力會高d. 我實在唔忍心要佢再受到痛苦, 後來, 我向多幾個獸醫咨詢, 綜合大家意見, 認為妹妹活動能力並未有受到影響, 所以切除手術並不需要.
到咗妹妹差不多一歲0既時間, 獸醫又發現妹妹牙肉不尋常咁紅腫起來, 懷疑妹妹患0既係貓免疫不全症, 醫生話先要同妹妹抽血,洗牙, 再抽牙肉組織去作進一步既化驗. 我當時真係好心疼 , 點解小小0既生命要受到一次又一次0既折磨?如果妹妹真係患上咗貓愛滋, 佢就要同2個哥哥分開, 注定佢要一隻貓生活.
係等待報告0既期間, 我考慮咗好多問題同方案, 我實在唔捨得將佢地三隻貓貓分開, 我地係唔會捨棄妹妹. 妹妹病咗, 佢更加需要我地, 由佢入屋0既一刻, 我地就係一家人, 我地係唔會放棄任何一個.
報告出咗, 獸醫話妹妹無事, 但係就解釋唔到點解妹妹牙肉既情況, 我地總算又過一關. 話妹妹需要我, 其實佢先係我既支柱, 佢令我明白到, 一家人係唔應該被任何事情分開, 難關係要一齊去克服咖.
同妹妹相處咗差唔多兩年, 妹妹暫時總算無其他大恙, 雖然, 妹妹仲係好怕人, 但係就鍾意靜靜咁係我身邊, 又或者黏住倆個哥哥, 有時妹妹訓醒, 將開眼仔0既時候, 如果見唔到我同大貓, 就會大聲喵喵咁叫, 仲好似BB貓咁樣, 你話佢幾 “Dad” 呢?
小龍係我地屋企0既寶貝, 雖然佢一出世就受到痛苦, 但係我相信只要我地悉心照顧佢, 佢都可以成為一隻健康愉快的貓貓, 當然, 佢依家巳經係一隻開心快樂0既貓貓啦. 願大家都可以付出愛心, 愛護我地0既動物朋友, 係幫助佢地0既同時, 往往得著0既就係自己 .
